HOME | Irenaeus Home | Previous - Next ... (p. 118): Perry 79 (more)

Fabula 42. Catus et Mures.

Praedam magnam stragemque Catus pervalidus faciebat Murium in quadam domo. Hi, videntes se in dies consumi, consilium ineunt, quid facto opus, ut ruinae suae occurrant et obsistant. Decernunt standum in supernis aedium partibus, nusquam descendendum. Id consilii non latuit Catum pervigilem et cum in eos irrumpere aut reptare non posset, arte sibi utendum putavit. Finxit se mortuum, in loco unde desuper prospici poterat a Muribus, suspendens se posterioribus pedibus ad palum parieti infixum, sed spe irrita ac otiosa fraude. Nam visus a quodam et cognitus, is sociis in haec verba praesentibus prorupit: "Sis vivus aut mortuus, nescio: sed etiam si te follem aut pellem vacuam putem, non accedo, non me committo." Indicans prudentem virum, si semel periculum evasit, hosti aperte non se expositurum.

Praedam magnam stragemque

Catus pervalidus faciebat

Murium in quadam domo.

Hi,

videntes

se in dies consumi,

consilium ineunt,

quid facto opus,

ut ruinae suae occurrant

et obsistant.

Decernunt

standum

in supernis aedium partibus,

nusquam descendendum.

Id consilii

non latuit Catum pervigilem

et cum in eos irrumpere aut reptare

non posset,

arte

sibi utendum putavit.

Finxit se mortuum,

in loco

unde desuper prospici poterat

a Muribus,

suspendens se

posterioribus pedibus

ad palum parieti infixum,

sed spe irrita

ac otiosa fraude.

Nam visus a quodam

et cognitus,

is

sociis in haec verba praesentibus

prorupit:

"Sis vivus aut mortuus,

nescio:

sed etiam si

te

follem aut pellem vacuam

putem,

non accedo,

non me committo."

Indicans

prudentem virum,

si semel periculum evasit,

hosti

aperte non se expositurum.